Fallacis aulae pompa, criminum mater,
Quae turbulentae pulverem bibis pompae,
Rituque semper fluctuantis Euripi
Et huc et illuc ambulando, cursando,
Confabulando, garriendo, ludendo,
Et usque et usque et usque consalutando
Quotidiano mersa navigas coeno,
Centumque pictis curribus lutum rumpis:
Sis o beata, delicata, formosa,
Morum Charybdis, aula, pectorum Circe,
Dolosa Siren, innocentiae labes,
Fraudum satelles, officina fucorum:
Eas superbis semifulta lecticis,
Eas sereni luce pulchrior Phoebi,
Et per supinae colla plebis incedas.
Habe venustos, aureos, capillatos,
Pictos, perunctos, deque scrinio totos
Anteambulones laudis et trahas pompae;
Dum noster aulas Aloysius vitet
Centumque velis et rudentibus centum,
Centum phaselis palmulisque devitet.
Habe capaces patrimonii Scyllas,
Fundi Maleas, spongias crumenarum,
Onusta laudum plaustra nominum rhedas,
Plenas jocorum risuumque carrucas,
Ineptiarum mille turgidos folles,
Quibus dolosae fieta dona naturae
Vultus poetas et poetrias linguas
Fecere dudum, susque deque vertere;
Quibus loquaci inficetiae plena
Negotiosa liminum salutatrix
Famelicorum turba circulatorum
Nugasque mille vendit, et locat risum,
Fraudumque frustis mille, mille fucorum,
Mendaciorum mille, mille nugarum
Suitque subsuitque mille centones:
Dum noster aulas Aloysius vitet,
Centumque Pboebis et Plilegontibus centum
Centum quadrigis Pegasisque devitet.
Illum citato praepes impetu virtus
Supra secures Caesarum et Numae fasces,
Regumque et omne culmen Imperatorum,
Undamque supra civium et fori fluctus
Enavigantem, passibusque non tardis
Mortalitatis saeva ju ra calcantem,
Nimbosque late filiosque nimborum,
Super cometas, rauca fulminum regna,
Puerperamque grandinum et nivis lunam
Ad usque rerum vexit ultimos fines.
Ibi ille pulcher imperator astrorum,
Novae beatus institor voluptatis,
Plenum sonora gaudium bibit ripa,
Rerumque dulci naufragatur in ponto.
I nunc, superba, delicata, formosa,
I, dives aula: sis beata, sis pulchra,
Conchyliata, purpurata, sis magna;
Dum te inde noster Aloysius ridet.