Jocose Scazon, si quid hactenus mecum
Molli sub umbra populive laurive
Lenisve buxi pampinive lusisti,
Valere jussis arbitrisque eurisque
Mecum sub alta feriare cupresso:
Mundoque versu simplicique dicamus,
Quid ille noster, ille civis astrorum,
Agit coruscis Aloysius campis?
Non ille nostros ducit amplius soles:
Non hac phaselo corporis levis mundi
Tumultuoso fluctuatur in ponto.
Non has vocabat patrias domos umquarn;
Coelum vocabat patrias domos semper.
Huc ille remis, huc rudentibus totis,
Ipsisque plenus carbasis anhelabat;
Huc aestuantes dirigebat antennas:
Huic alligavit insulae suam navim.
Hic sempiterni vere cingitur Maji,
Hic pervagatur elegantibus campis,
Hic rure coeli fruitur, et procul curis
Inter virentes aureis comis lauros,
Crispas cupressos, ilices capillatas
Quotidianus ambulator incedit:
Qua bruma nusquam, vel comantis autumni
Tonsor November frondeum nemus radit,
Ridetve calvos Januarius montes;
Sed delicatos criniuntur in flores
Aeterna prata: musici strepunt luci:
Ripae loquuntur murmurantibus rivis:
Et limpidorum margines fluentorum,
Et hinc et illinc invicem cachinnantur:
Manusque pulsu vel volubilis plectri,
Oblivioso de silentii somno
Expergefacta sponte garriunt plectra:
Lenique subter dormiente Neptuno
Tenerrimorum mollis aura ventorum
Depectit agros: desides hiant Euri
Et otiosis oscitantur in campis.
Hic ille noster, ille civis astrorum,
Conchyliato purpuratus ornatu,
Eunte pompa siderum coronatur,
Solisque fulva totus ardet in palla.
Et nunc per arces Coelitum, per accessus,
Amethystinata templa, gemmeas sedes,
Et civitatis per forum Sioneae,
Et fulgurantum porticus platearum,
Calcat superbum siderum pavimentum.
Hic Lainium compellat, hic Everardum,
Hic laetus ambit Borgiam salutator,
Ignatiove flammeove Francisco
Enarrat, ipsa delicatior Suada,
Miranda temporum acta Claudianorum:
Suoque longos Mutio rogat soles:
Mellisque rivos balsamique miratur
Et gaudiorum nectarisque lactisque
Formosa picta stagna trajicit cymba,
Et delicato naviculatur in ponto;
Nanosque colles bispidasque verrucas
Pulcherrimorum lustrat ilicetorum.
O gestientum dulce siderum regnum!
Vestrum clientem, pro laboribus tantis
Doloribusque lacrimisque curisque
Desideratos recreate per campos.
Gaudete, Tempe siderum, domus coeli;
Ridete, quidquid est domi voluptatum:
Plorate, quidquid est foris querelarum.