Ingens gloria temporum tuorum
Bellarmine Pater, beatiorum
Facundissime cygne gratiarum:
Conatusque tuos tuasque noctes,
Sanctae pignora lucubrationis,
Victuros Pyliam libros senectam,
Palatina pio terebat usu,
Nec torpere sinebat, anguloque
Aut segnes humili jacere mensa,
Coeli delicias, Gradusque coeli:
Queis, sacra pariter tuaque penna,
Aeternam reseras beatitatem:
Et gemmantia templa nundinaris
Lamentis gemituque lacrimisque.
Istos illa diu legens libellos
Festinabat, et omnibus lacertis,
Kemis omnibus omnibusque velis
Ad coeli properabat usque portum.
Nunc densis lacrimis laboribusque
Et densis lacrimis doloribusque,
Coeli nobile nundinata culmen,
Formosis spatiatur in viretis.
Quid diei melius beatiusve,
Bellarmine, tuis potest libellis?
Palatina tuis beata libris,
Tu lectore beatus es librorum.