Pulvereis simulant dum rauca tonitrua flammis,
Martiaque artifici fulmina nube ruunt;
Attonitis pelagi genitor Neptunus ab undis
Sulphureo afflatum sustulit igne caput.
Ecquis, ait, nostri tranquilla silentia regni
Et resides bello sollicitavit aquas?
Jamque sibi duci volucres ad frena quadrigas,
Tritonemque cava proelia flare tuba,
Armarique Notos tempestatesque jubebat,
Et Thetin armatis vellere signa feris;
Cum procul Ursini fluitantia signa Gradivi
Prospicit impulsis velificata Notis.
Ursus erat signum, picto qua sutilis Urso
Pensilis e summa carbasus arce fluit.
Heus, ait, inceptis, hiemes, absistite pugnis,
Et vos, caeruleae, ponite bella, ferae;
Novimus excussum jaculantia monstra profundum
Quae fera concepto mugiit igne, nova est.