Epigrammata (Sarbievius) — CXXXI. In eundem et Aquilam Moscoviticam.

Quadrupedum frustra dominum volucrumque lacessis:
Non nisi cum magnis dimicat ille feris,
Servantur tantae magnis cervicibus irae:
Non potes hoc tenuis praeda sub hoste mori.
Si tamen insigni cupias occumbere leto,
Non meliore mori praeda sub hoste queas.
In pennis aquilam, cognoscis in ungue leonem.
Si pugnas, unguis: si fugis, ala premet.