Epigrammata (Sarbievius) — CLXI. Ad eundem.

Alter belligeri jactet sua stemmata Martis,
Ensem, vel crudam tela datura necem.
Gaudeat hic doctae referens insignia divae,
Fulmineae referens plumea texta jubae.
Et quicunque volet, se tollat Apollinis arcu,
Vel ferat Arcadii mitia signa dei.
De Cruce praesul ovat: nil illo majus, alumnum
Quem fecit proprii stemmatis ipse Deus.