Viator et Fama colloquuntur.
VIATOR
Die age, quid tumulos servas, dea?
fama
Nostra tuemur
Iura.
viator
Deos cinerum num quoque cura tenet?
fama
Haec mihi prima quidem cura est.
viator
Quid concutis alas
usque?
FAMA
Fugo tenebras, quo vigeant tumuli.
VIATOR
Quid sibi, quae collo pendet, tuba?
FAMA
Nomen amico
dat cineri; ad tumulos hac ego gesta cano.
VIATOR
Die agedum, manes cuius hi?
FAMA
Vatis; at urnam
officio posuit docta Minerva suo.
Hos tumulos Iovianus habet; quae serta virescunt,
lecta suis manibus disposuere deae.
Sed manes ne quaere die: per amoena vagantur
prata, sonat riguae sicubi murmur aquae;
nymphae assunt et adest dulcis Charis; aurea cantu
fila movent; leni concinit aura sono.
Nocte illum complexa fovet nitidissima coniunx;
fervet et a nulla parte refrixit amor;
haec illi comes in tenebris, quas vincit amoris
lucida fax: gemina luce coruscat amor.