Nunc viridant segetes, nunc floret germine campi,
nunc turgent vites, est nunc pulcherrimus annus,
nunc pictae volucres permulcent ethera cantu,
nunc mare, nunc tellus, nunc celi sidera rident.
At non tristificis perturbat potio sucis,
cum medus atque Ceres, cum Bacchi munera desint,
heu -- quam multiplicis defit substantia carnis,
quam mitis tellus generat, quam roscidus ether.
Scriptor sum (fateor), sum musicus alter et Orpheus,
sum bos triturans, prospera quaeque volo.
Sum vester miles sophie preditus armis;
pro nobis nostrum, Musa, rogato patrem.