Hanc regat omnipotens Michael angelus aram,
Per quem victus erat perfidus ille draco,
Et procul ejectus celso de culmine coeli
Qui culpare cupit semper in ore pios.
Jungitur huic Gabriel, socius venerabilis, arae,
Qui virtute pia fulget in arce poli.
(0772D)Cujus ab ore sacro mundi generare salutem
Didicit aeternum, virgo Maria, Deum,
Additur his Raphael, oculos qui forte Tobiae
Sanavit, natum duxit et ille suum.
Hos tres hic precibus nostris astare precamur,
Audiat ut famulos Christus ab arce suos.