Las campanas dedins lous ers
Sonoun sous darriès cants de joia.
Lou grand mestre de l’univers
Sus lous nibous cargat de gloria,
Vei douçament soun fil mountà.
Lou pople, roumplit d’allegressa,
Crida e recrida; Alleluia!!
Lou campestre, de sa tristessa,
Se despolha per moustrà ’u ciel
Soun desabilhè dau dimenche
Desabilhè verd, lou pus bel.
Dins las flous, l’aussel molha l’enche:
De son gargalhol veloutat,
Rescoundut jouta la verdura,
Canta l’amour e la bountat
D’aquel qu’a creat la natura.
L’er es tebés, lou ciel es blu,
Pople, ioi es jour d’aumeleta!
Pople, ioi es festa per tu.
E pos anà beure foulheta!
Mestieirau, bourgés, artisan,
Estudiant, boutiquié, lauraire,
Mandem lou traval à deman,
Tout sauta e ris dins lou terraire.
A la font de Sant Bertoumieu
Las aigas soun toujour claretas.
Currissès-ie couma en estieu,
Delargàs-vous, valhents garçous,
Cantàs, dansȧs jusquas au vespre,
Cantàs las pus belas cansous.
Dins lous camps flourits fai bon estre.
Mais quand la rana cantarà,
Quand au ciel veirés las estelas,
De l’oustau caudrà se serrà.
Vous atardés pas doumaiselas!
Adieu l’auboi, lou tambourin,
La riba verda ounte l’on gousta!
Vite au travai! pas pus de trin!
Nous reveirem à Pantacousta.
.mw-parser-output .sindes{display:inline-block;height:1em;text-indent:0}.mw-parser-output .sindes>span{position:absolute}.mw-parser-output .sindes>span:first-child{left:0}.mw-parser-output .sindes>span:nth-child(2){right:0}(S.º D.º di Montpellier)(Lou Felibrige latin).