Dongie un buscút indurmidît un dí,
dal ciant d’un rusignûl iò foi dismòt,
e al mi pareve che al disès a mi
Va cîr, va cîr, va cîr di dí e di gnot.
Alore in tal pinsîr ’e mi vigní
Nine s’ciampade, e al cûr mi dè un gran bot;
tant plui, che in altri viars sintii cussí:
Ciar fi, ciar fi, ciar fi, va vie di trot.
Par cori, in faz, mi alzai dut sbigutît,
ma subit mi legrai, che in altri ton
sintii: Cîr, cîr la pâs in altri sît.
Iò ’i domandai in ce luc, e in qual cianton
cu à pâs un che d’Amôr al è ferît,
ma al fuí sence plui dî, ché nol fo bon.