Pos de chantar m’es pres talenz,
Farai un vers, don sui dolenz :
Mais non serai obedienz
En Peitau ni en Lemozi.
Qu’era m’en irai en eisil :
En gran paor, en gran péril,
En guerra laissarai mon fil,
E faran li mal siei vezin.
Lo départirs m’es aitan grieus
Del seignoratge de Peitieus !
En garda lais Folcon d’Angieus
Tota la terra e son cozi,
Si Folcos d’Angieus no.l socor,
E · l reis de cui ieu tenc m’onor,
Faran li mal tut li plusor,
Felon Gascon et Angevi.
Si ben nos es savis ni pros,
Cant ieu serai partiz de vos,
Vias l’auran tornat en jos,
Car lo veiran jov’ e mesqui.
Merce quiera mon compaignon,
S’anc li fi tort qu’il mo perdon ;
Et ieu prec en Jesu del tron
Et en romans et en lati.
De proeza e de joi fui,
Mais ara partem ambedui ;
Et eu irai m’en a scellui
On tut peccador troban fi.
Moût ai estat cuendes e gais,
Mas nostre Seigner no.l vol mais ;
Ar non puesc plus soffrir lo fais,
Tant soi aprochatz de la fi.
Tot ai guerpit cant amar sueill,
Cavalaria et orgueill ;
E pos Dieu platz, tot o acueill,
E prec li que.m reteng’ am si.
Toz mos amies prec a la mort
Que vengam tut e m’onren fort,
Qu’eu ai avut joi e déport
Loing e près et e mon aizi .
Aissi guerpisc joi e déport
E vair e gris e sembeli.