Ki divers Cuntes veut traitier,
Diversement deit comencier ;
E parler si rainablement,
K’il seit pleisibles à la gent.
Ici comencerai Milun
E mustrai par brief sermun,
Pur quoi è coment fu trovez
Li Lais ke ci vus ai numez.
Milun fu de Suhtwales nez,
Puis le jur k’il fu adubez,10
Ne trova un sul Chevalier
K’il abatist de sun destrier.
Mut par esteit bons Chevaliers,
Francs, è hardiz, curteis, è fiers ;
Amez fu conuz en Irlande,
En Norweje è en Guhtlande,
En Loengre è en Albanie.
Eurent plusurs de li envie ;
Pur sa pruesce iert mut amez,
E de muz Princes honurez ;20
En sa cuntrée ot un Barun
Mès jeo ne sai numer sun nun :
Il aveit une fille bele,
Mu curteise Dameisele
Ele ot oï Milun nomer,
Mut le comencat à amer.
Par sun message li manda
Que si li plust, el l’amera.
Milun fu liez de la novele,
Si en merciat la Dameisele ;30
Volenters otriat l’amur,
Ne partirat jamès nul jur,
Asez li fait curteis respuns,
Al messagé dona granz duns,
E grant amistié préinet ;
Amis, fet-il, ore entremet,
Que à m’Amie puisse parler,
E de notre cunseil celer :
Mun anel d’or li porterez,
E de meïe part li direz,40
Quant li plerra si vien pur mei,
E jeo irai ensemble od lei :
Cil prent cungé, è si le lait ;
A sa Dameisele revait,
L’anel li dune, si li dist,
Que bien ad fet céo k’il quist.
Mut fu la Dameisele lie
De l’amur issi li otrie :
Delez la chambre en un vergier,
U ele alout esbanier,50
Là instorent lur parlement,
Milun è ele bien suvent.
Tant i vint Milun, tant l’ama,
Que la Dameisele enceinta.
Quant aparceit qu’ele est enceinte,
Milun manda, si fist sa pleinte ;
Dist li cum cil est avenu,
Sun père è sun bien ad perdu,
Quant de tel fet s’est entremise,
De li iert fait grant justise.60
A glaive serat turmentée
Vendue en autre cuntrée,
Ceo fu custume as anciens,
Issi teneïent en cel tens.
Milun respunt que il fera
Ceo que ele cunseillera :
Quant l’Enfant, fait-ele, ert nez,
A ma Serur le porterez
Qui en Norhumbre est mariée,
Riche Dame, pruz, enseignée.70
Si li manderez par escrit,
E par paroles, è par dit,
Que c’est l’enfant de sa serur,
S’en ad suffert meinte dolur.
Ore gart k’il seit bien nuriz,
Qu’il ke co seit u fille, u fiz ;
Votre anel al col li pendrai,
E un brief li enveierai,
Escrit iert le nun sun Père,
E l’aventure de sa Mère.80
Quant il serat grant è créuz
E en tel éage venuz,
Que il sache reisun entendre
Le bref è lanel li deit rendre ;
Si li cumant tant à garder
Que sun père puisse trover.
A sun cunseil se sunt tenu,
Tant que li termes est venu,
Que la Dameisele enfanta :
Une Vielle ki la garda,90
A ki tut sun estre géi,
Tant l’a cela, tant l’a covri,
Uncques ne fu aparcevance
En parole, ne en semblance.
La Meschine ot un Fiz mut bel,
Al col li pendirent l’anel,
E une aumonière de seie
Puis le brief que nul nel’ veie.
Puis le cuchent en un bercel,
Envolupé d’un blanc lincel ;100
Desuz la teste al enfant,
Mistrent un oreiller vaillant ;
E de suz lui un covertur,
Urlé de martre tut entur.
La Vielle l’ad Milun baillié
Cil at atandu al vergié,
Il le cumaunda à teu gent,
Ki l’aportèrent léaument ;
Par les viles ù il errouent
Set féïz le jur resposouent.110
L’enfant feseient alietier
Cucher de nuvel, è baignier ;
Nurice menoent od aus,
E itant furent-il léaus,
Tant unt le dreit chemin erré,
Qu’à la Dame l’unt comandé,
El le receut s’il en fu bel,
Le brief li baille è le scel ;
Quant ele sot ki il esteit,
A merveille le chériseit,120
Cil ki l’enfant eurent porté
En lur païs sunt returné.
Milun eissi fors de sa tere
En soudées pur sun pris quere,
S’Amie remist à meisun ;
Sis Pères li duna Barun ;
Un mut riche Hume del’ païs,
Mut efforcible, è de grant pris.
Quant elle sot cele aventure,
Mut est dolente à démesure,130
E suvent regrete Milun
E mut dute la mesprisun
De céo que ele ot enfant,
Il le sauera de meintenant.
Lasse, fet-ele, quoi ferai !
Aurai Seignur cum le perdrai.
Jà ne sui-jeo mie Pucele,
A tuz-jurs mès serai ancele :
Jeo ne sai pas qu’il fust issi,
Ainz quidoue aveir mun ami.140
Entre nus, ce lisum l’afaire
Jà nel’ oïsse aillurs retraire,
Meus me vaudreit murir que vivre
Mès jeo ne sui mie délivre ;
Ainz ai asez sur mes gardeins
Veuz è jeofnes, mes Chamberleins
Que tuz-jurz héent bone amur,
E se délitent en tristur.
Or m’estuvrat issi suffrir,
Lasse ! quant jeo ne puis murir,150
Al terme ke ele fu donée
Sis Sires l’ad puis amenée.
Milun revient en sun païs,
Mut fu dolent è mut pensis,
Grant doel fist è démena,
Mès de ceo se recunforta,
Que près esteit de la cuntrée
Cele k’il tant aveit amée ;
Milun se prist à purpenser
Coment il li purrat mander,160
Si qu’il ne seit aparcéuz
Que il est al païs venuz.
Ses lettres fist, sis sééla ;
Un Cisne aveit k’il mut ama
Le brief li ad al col lié
E dedenz la plume muscié
Un suen Esquier apela,
Sun message li enchargea.
Va tost, fet-il, change tes dras.
Al chastel m’Amie en irras :170
Mun Cisne porteras od tei,
Garde que en prengez cunrei
U par servant, u par meschine,
Que presenté li seit le Cisne.
Cil ad fet sun comandement
A-tant s’en vet, le Cigne prent,
Tut le dreit chemin que il sot ;
Al chastel vient si cum il pot.
Parmi la vile est trespassez,
A la mestre porte est alez,180
Le portier apelat à sei ;
Amis, fet-il, entent à mei :
Jeo sui un hum de tel mester
D’oiseus prendre me sai aider,
Une huchie de suz Karliun
Pris un Cisne od mun lacun ;
Pur force è pur meintenement,
La Dame en voil fère présent
Que jeo ne seie desturbez,
E cest païs achaisunez.190
Li Bachelers li respundi :
Amis, nul ne parole od li ;
Mès pour ce jeo irai saveir
Si jéo poeïe lui véeir,
Que jeo te puisse amener
Jeo te fereïe à li parler.
A la sale vient li Porters
Ni trova fors deus Chevalers,
Sur une grant table séeient,
Od uns granz eschés déduieent.200
Hastivement retourne arère
Celui ameine en teu manère,
Que de nul ne ne fu scéuz,
Desturbez, ne aparcéuz.
A la chambre vient, si apele
L’us lur ovri une Pucele :
Cil sunt devant la Dame alé
Si unt le Cigne presenté.
Ele apelat un suen Varlet
Puis si li dit ore t’entremet210
Que mis Cisnes seit bien gardez,
E ke il eit viande asez.
Dame, fet-il, k’il’ aporta,
Jà nul fors nus nel’ recevra,
E jà est-ceo présent réaus
Véez cum est bons è béaus.
Entre ses mains li baille è rent
El le receit mut bonement.
Le col li manie è le chief,
Desuz la plume sent le brief ;220
Le sanc li remut è frémi,
Bien sot qu’il vient de sun Ami ;
Celui ad fet del’ suen doner,
Si l’en cumande à aler.
Quant la chambre fu délivrée
Une Meschine ad apelée,
Le brief aveient deslié
Ele en ad le scel debrusé.
Al primer chief trova Milun,
De sun Ami cunut le nun ;230
Cent feiz le baise en plurant,
Ainz que ele puist dire avant :
Al chief de pièce véit l’escrit,
Ceo k’il ot cumandé è dit :
Les granz peines, è la dolur,
Que Milun séofre nuit ê jur.
Ore est del’ tut en sun pleisir,
De lui ocire u de garir,
Si ele seust engin trover,
Cum il péust à li parler :240
Par ses lettres si remandast,
E le Cisne li renvéast ;
Parmi le face bien garder,
Puis se le laist tant jéuner
Treis jurs que il ne seit péuz,
Le brief li seit al col penduz,
Laist l’en aller, il volera,
Là ù il primes conversa.
Quant ele ot tut l’escrit véu,
E ceo quele i ot entendu,250
Le Cigne fet bien surjurner,
E forment pestre è abevrer ;
Dedenz sa chambre un meis le tint
Mès ore oez cum l’en avint,
Tant quist par art è par engin,
Ke ele ot enkre è parchemin,
Un brief escrit tel cum li plot,
Od un anel l’en séelot.
Le Cigne ad laissié juner,
Al col li pent, sil’ laist aler :260
Li Oiseus esteit fameillus,
E de viande covéitus,
Hastivement est revenuz,
Là dunt il primes fu venuz.
A la vile è en la meisun
Descent devant les piez Milun.
Quant il le vit mut en fu liez
Par les èles le prent haitiez :
Il apela un despensier,
Si li fet doner à mangier.270
Del’ col ad le brief osté,
De chief en chief l’ad esgardé,
Les enseignes qu’il i trova,
E des saluz se reheita ;
Ne pot ganz li nul bien aveir,
Or li remeint tut sun voleir.
Par le Cigne si faitement
Si ferat-il hastivement ;
Vint anz menèrent cele vie,
Milun entre lui è s’Amie :280
Del Cigne firent messager
Ni aveïent autre enparler,
E si le feseient jeuner.
Ainz qu’il le lessassent aler,
E cil à ki l’Oiseus veneit,
Ceo sachez que il le peisseit ;
Ensemble viendrent plusurs feiz,
Nul ne pot estre si destreiz,
Ne si tenuz estreitement,
Que il ne truisse lui sovent.290
La Dame qui sun Fiz nurri
Tant ot esté ensemble od li,
Quant il esteit venut en ée,
A Chevalier l’ad adubé.
Mut i aveit gent Dameisel
Le brief li rendi è l’anel,
Puis li ad dit ki est sa Mère,
E l’aventure de sun Père,
E cum il est bon chevaliers,
Tant pruz, si hardi, è si fiers.300
N’ot en la tère nul meillur
De sun pris ne de sa valur :
Quant la Dame li ot mustré
E il l’aveit bien escuté,
Del’ bien sun père s’esjoï
Liez fu de çeo k’il ot oï.
A sei méïsmes pense è dit,
Mut se deit-hum priser petit,
Quant il issi fu engendrez,
E sun Père est si alosez,310
S’il ne se met en greinur pris ;
Fors de la tère è del païs.
Asez aveit sun estuveir,
Il ne demure fors le seir
Al demain ad pris cungié
La Dame l’ad mut chastié,
E de bien fère amonesté,
Asez li ad aveir doné.
A Suhthamptune vait passer,
Cum il ainz pot se mist en mer,320
A Barbefluet est arrivez,
Dreit en Brutaine est alez :
Là despendi è turnéia,
As riches hummes s’acuinta.
Unkes ne vint en nul estur,
Que l’en nel’ tenist à meillur.
Les povres chevaliers amot,
Ceo que des riches il gainot,
Lut donout è sis reteneit,
E mut largement despendeit.330
Unkes sun voil ne sujurna
De tutes les tères de là,
Porta le pris è la valur,
Mut fu curteis, mut sot honur.
De sa bunté è de sun pris,
Vint la novele en sun païs,
Qu’un Damisels de la tere
Ki passa mer pur pris quere,
Puis ad tant fet par sa pruesce,
Par sa bunté, par sa largesce,340
Que cil ki nel’ seivent numer
L’apelent hum par tut Sanz-Per.
Milun oï celui loer
E les biens de lui recunter,
Mut ert dolent, mut se pleigneit
Del’ Chevalier qui tant valeit.
Pur tant cum il péust errer,
Ne tourneier, ne armes porter,
Ne déust nul del’ païs nez,
Estre preisiez ne alosez.350
De une chose se purpensa,
Hastivement mer passera,
Si justera al Chevalier
Pur li leidier è l’empeirer ;
Par ire se vodra cumbatre,
Sil’ le pout del’ cheval abatre
Dunc serat-il enfin honiz,
Après irra quere sun Fiz,
Qui fors del’ païs est eissuz
Mès ne saveit ù est venuz.360
A s’Amie le fet saveir,
Cungé voleit de li aveir ;
Tut sun curage li manda,
Brief è sçel li envéa,
Par le Cigne mun escient
Or li remandast sun talent.
Quant ele oï sa volenté
Mercie l’en, si li sot gré,
Quant pur lur Fiz trover è quere,
Voleit eissir fors de la tere,370
Pur le bien de li mustrer,
Nel’ voleit mie desturber.
Milun oï le mandement,
Il s’aparaille richement,
En Normendie est passez,
Puis est desque Bretaine alez.
Mut s’aquointa, à plusurs genz,
Mut cercha les tournéiemenz,
Riches osteus teneit sovent,
E si dunot curteisement ;380
Tut un yver, ceo m’est avis,
Conversa Milun al païs ;
Plusurs bons Chevaliers retient.
Desque près la Paske revient,
Kil recummencent les tourneiz,
E les guères, è les dereiz,
Al munt Seint-Michel s’asemblèrent,
Normein, è Bretun i alèrent ;
E li Flamenc, è li Franceis,
Mès ni ot guère de Engleis.390
Milun i est alé primers
Qui mut esteit bons Chevalers ;
Le bon Chevaler demanda,
Asez i ot ki li cunta,
De quel part il esteit venuz,
A ses armes, à ses escuz ;
Tut l’eurent à Milun mustré
E il l’aveit bien esgardé.
Dunc li tourneimenz s’asembla ;
Ki juste quist tost l’a trova,400
Ki aukes volt les rens cerchier,
Tost pout i perdre u gaignier,
E encuntrer un Cumpainun,
Tant vus voil dire de Milun ;
Mut le fist bien en cel estur
E mut i fu prisez le jur.
Mès li Vallez dunt jeo vus di,
Sur tuz les autres ot le cri,
Ne se pot nul acumpainier,
De turnéer ne de juster.410
Milun le vit si cuntenir,
Si bien puindre, è si férir,
Parmi tut ceo k’il l’enviot :
Mut li fu bel, è mut li plot.
Al renc se met encuntre lui,
Ensemble justèrent amdui :
Milun le fiert si durement,
Lansce dépièce vereiement.
Mès nel’ aveit mie abatu
Jà l’aveit lui tant si feru,420
Que jus del’ cheval l’abati ;
De suz la ventaille choisi,
La barbe e les chevoz chanuz,
Mut li pesa k’il fu chéuz.
Par la reisne le cheval prent,
Devant lui le tient en présent,
Puis lui ad dit : Sire, muntez,
Mut sui dolent è trespensez,
Que nul hume de vostre eage,
Devreit faire tel utrage :430
Milun saut sus, mut li fu bel,
Al dei celui cunuit l’anel,
Quant il li rendi sun cheval,
Il areisune le Vassal.
Amis, fet-il, à mei entent,
Pur amur Deu omnipotent !
Di mei cument ad nun tun père,
Cum as-tu nun, ki est ta mère ?
Saveir en voil la vérité.
Mut ai véu, mut ai erré,440
Mut ai cerché en autres tères,
Par turneiemenz, è par guères,
Unc par coup de nul Chevalier,
Ne chaï mès de mun destrier.
Tu m’as abatu al juster,
A merveille te puis amer.
Cil li respunt, jol’ vus dirai
De mun père tant cum j’en sai.
Jeo quid k’il est de Gales nez
E si est Milun apelez ;450
Fille à un riche hume ama
Céléement me engendra ;
En Northumbre fu envéez
Là fu nurri è enseignez.
Une vieil Aunte me nurri
Tant me garda ensemble od li,
Chevals è armes me dona,
En ceste tère m’envéa.
Ci ai lungement conversé
En talent ai è en pensé,460
Hastivement mer passerai
En ma cuntréie m’en irrai ;
Savéir voil l’estre mun père
Cum il se cuntient vers ma mère
Tel anel d’or li musterai,
E teus enseignes li dirai,
Jà ne me vodra renéer
Ainz m’amerat è tendrat chier.
Quant Milun l’ot issi parler,
Il ne poeit plus escuter ;470
Ayant sailli hastivement,
Par le pan del’ hauberc le prent,
E Deu, fait-il, cum sui gariz,
Par fei, amis, tu es mi Fiz,
Pur tei trover è pur tei quere,
Eissi vins-jeo fors de ma tere.
Quant cil l’oï à pié descent,
Sun Peire baisa ducement,
Bel semblant entre eus feseient,
E iteus paroles diseient480
Que li autres kes’ esgardouent,
De joie è de pité plurouent.
Quant li turnéiemenz départ,
Milun s’en vet mut li est tart,
Qu’à sun Fiz parlot à leisir,
E qu’il li die sun pleisir :
En un ostel furent la nuit,
Asez eurent joie è déduit,
Les Chevalers eurent plenté.
Milun ad à sun Fiz cunté490
De sa Mère, cum il l’ama,
E cum sis Pères l’a duna
A un Barun de sa cuntrée,
E cument il l’ad puis amée
E ele lui de bun curage
E cum del’ Cigne fist message.
Ses lettres lui feiseit porter,
Ne s’osot en nullui fier.
Le Fiz respunt : par fei, bel Père,
Assemblerai vus è ma Mère,500
Sun Seignur qu’ele ad ocirai
E espuser l’a vus ferai :
Cele parole dunc lessèrent
E al demain s’apareillèrent ;
Cungé prenent de lur amis,
Si s’en revunt en lur païs.
Mer passèrent hastivement,
Bon ore eurent è suef vent ;
Si cum il eirent le chemin,
Si encuntrèrent un Meschin,510
Del’ Amie Milun veneit
En Bretaigne passer voleit :
Ele li aveit envéié,
Ore ad sun travail acurcié ;
Un brief li baille ensçelé
Par parole li ad cunté
Que s’en venist, ne demurast,
Morz est sis Sires or s’en hastast.
Quant Milun oï la novele
A merveille li sembla bele ;520
A sun Fiz ad mustré è dit,
Ni ot essuigne, ne respit.
Tant eirent que il sunt venu
Al chastel ù la Dame fu ;
Mut par fu liez de sun beau Fiz
Qui tant esteit pruz è gentiz,
Unc ne demandèrent parent,
Sanz cunseil de tut autre gent,
Lur Fiz amdeus les asembla,
La Mère à sun Père dona.530
En grant bien è en grant duçur,
Vesquirent puis è nuit è jur.
De lur amur è de lur bien
Firent un Lai li Auncien ;
E Jeo qui l’ai mis en escrit
Al recunter mut me délit.536