I.L’autrier un jor aprés la Saint Denise
Fui a Betune, ou j’ai esté sovent.
La me sosvint de gent de male guise
4Ki m’ont mis sus mençoigne a entïent :
Ke j’ai chanté des dames laidement ;
Mais il n’ont pas ma chançon bien aprise :
Je n’en chantai fors d’une solement,
8Qui bien forfist ke venjance en fu prise.
II.Si n’est pas drois ke on me desconfise,
Et vous dirai bien par raison coment :
Car se on fait d’un fort larron justice,
12Doit il desplaire as loiaus de noient ?
Nenil, par Diu ! qui raison i entent ;
Mais la raisons est si arriere mise
Ke çou c’on doit loer blasment la gent
16Et loent çou que nus autres ne prise.
III.Dame, lonc tans ai fait vostre service,
La merci Deu ! c’or n’en ai mais talant,
Que m’est ou cuer une autre amor assise
20Que me requiert et alume et esprant
Et me semont d’amer si hatement
C’an li n’en a ne orgoil me faintise ;
Et jel ferai, ne puet estre autrement,
24Si me metrai dou tout an sa franchise.
IV.A la millor del roiaume de France,
Voire del mont, ai mon cuer atorné,
Et non por quant pavor ai et dotance
28Ke sa valors ne me tiegne en vilté,
Car tant redoc orgelleuse beauté ;
Et Dieus m’en doinst trover bone esperance,
K’en tot le mont n’a orgoill ne fierté
32K’Amors ne puist plaissier par sa poissance.