O Saiſon bien-faiſante, aimable & douce Automne,
Toy que le Soleil void d’vn regard temperé ;
Toy qui par les preſens, que ta faueur nous donne,
Fais arriver vn bien, qu’on a tant eſperé.
Ce riche amas de fruits, dont ton front ſe couronne,
Rend par tous nos Hameaux, ton Autel reueré ;
L’Abondance te ſuit ; le Plaiſir t’enuironne ;
Mais vn plaiſir tranquille, auſsi bien qu’aſſuré.
Bachus te ſuit par tout ; & Cerés t’accompagne ;
Les Coſteaux eſleuez, & la vaſte Campagne,
Leurs raiſins & leurs bleds, te monſtrent tour à tour :
Chacun dans l’Vnivers, a le fruit de ſes peines ;
Moy ſeul, helas moy ſeul, abuſé par l’Amour,
N’ay qu’vn eſpoir trompeur, & des promeſſes vaines.