Je voudrois bien estre vent quelquefois
Pour me joüer aux cheveux d’Uranie,
Puis estre poudre aussi tost je voudrois
Quand elle tombe en sa gorge polie.
Soudain encor je me souhaitterois
Pouvoir changer en cette toile unie
Qui va couvrant ce beau corps que je dois
Nommer ma mort aussi tost que ma vie.
Ces changemens plairoient à mon desir,
Mais pour avoir encor plus de plaisir
Je voudrois bien puce estre devenue,
Je baiserois ce corps que j’ayme tant,
Et la forest à mes yeux incognue
Me serviroit de retraitte à l’instant.