A ! tantas bonas chansos
E tan bo vers aurai faih,
Don ja no.m mezer’ en plaih,
Domna, si.m pesses de vos
Que fossetz vas me tan dura.
Aras sai qu’e.us ai perduda !
Mas sivals no m’etz tolguda
En la mia forfachura.
Vers es que manhtas sazos
M’era be dih e retraih
Que m’estara mal e laih
C’ames et amatz no fos.
Mas lai on Amors s’atura,
Er greu forsa defenduda,
Que la neus, can ilh es nuda,
Par vas lei brun’ et escura.
Domna, si’ st fals enveyos,
Que mainh bo jorn m’an estraih,
S’i metion en agaih
Per saber com es de nos,
Per dih d’avol gen tafura
Non estetz ges esperduda :
Ja per me non er saubuda
L’amors ; ben siatz segura !
Bels Vezers, un’aventura
Avetz, et es ben saubuda :
Qued om que.us aya veguda,
De vos no fara rancura.
Chanso, vai t’en a La Mura;
Mo Bel Vezer me saluda.
Qui c’aya valor perduda,
La sua creis e melhura.